იმ დღიდან, როდესაც გავიგე, რომ ამ ფორუმისთვის ამ განყოფილებაში უნდა დამეწერა, ვფიქრობდი, როგორ დავწერდი პოსტს, რომელიც მიეძღვნებოდა დიზაინერს, რომელმაც მოდა და მოდის სამყარი თავისი პლიუს-მინუსებით გამაცნო და შემაყვარა. არავინ ყიფილა მასზე მნიშვნელოვანი ჩემთვის მოდის სამყაროში. არავინ დაბადებულა მასზე ჰუმანური და არავის ყვარებია ქალი, ქალის სილუეტი ისე, როგორც აზადინ ალაიას უყვარდა. ყველაზე გულწრფელად და ყველაზე ძლიერ. მას ჰქონდა ნიჭი ქალი ქალღმერთად ექცია, დედოფლად, რომელსაც საკუთარი თავის სჯეროდა , სექსუალობა და ფრანგული დახვეწილობა კი მისი განსაკუთრებული ხელწერაა.
აზადინ ალაია დაიბადა 26 თებერვალს, 1940 წელს ტუნისში. სწორედ იქვე დაამთავრა ხელოვნებისა და კულტურის სკოლა სკულპტურის განხრით, თუმცა სკულპტურა მისი ინტერესის სფერო არ ყოფილა, თუმცა ეს ცოდნა იგრძნობა მის ფანქარისებურ, გამოყვანილ სილუეტებში, რომელიც ქალის სხეულს უნაკლოდ გამოკვეთს.
1957 წელს გადადის პარიზში და იწყებს დიორის სახლში მუშაობას, თუმცა პარალელურად მალევე იჩენს პირად, ინკოგნიტო კლიენტებს.
შემდგომ მუშაობას იწყებს Guy Laroche-სთან და Thierry Mugler-თან და 1970 წლიდან ხსნის საკუთარ პატარა ატელიე- აპარტამენს.
1980 წელს აზადინმა წარმოადგინა პირველი კოლექცია და გამართა ჩვენება Park-Royal Marais-ში. მისი კოლექცია დიდი წარმატებით იყიდებოდა იმდროინდელ ცნობილ უნივერმაგებში და დიდი პოპულარობითაც სარგებლობდა, სწორედ ეს გახდა რვა წლის შემდგომ მისი საკუთარი მაღაზიების გახსნის წინაპირობა, რომლებიც პარიზსა და ნიუ იორკში მდებარეობს.
1984 წელს მან მიიღო საპატიო ჯილდო წლის საუკეთესო დიზაინერის და წლის საუკეთესო კოლექციინ ნომინაციაში. ჯილდო მას პირადად საფრანგეთის კულტურის მინისტრმა გადასცა. ხოლო შემდგომ წელს ალაიამ ფრანგული რევოლუციის 200 წლის თავის აღსაღნიშნად შექმნა კაბა ლურჯი, თეთრის და წითლის კომბინაცით. ალბათ, ამის შემდგომ არავის გაუჩნდება კითხვა, თუ რატომ უყვართ და რატომ სცემენ ალაიას ფრანგები პატივს. პასუხი მარტივია: ალაიას თავად უყვარდა საფრანგეთი და ფრანგი ხალხი განსაკუთრებულად.
დის გარდაცვალების შემდგომ, 1992 წლიდან მან შემოქმედებითი პაუზა აიღო და მხოლოდ ექსკლუზიურ კლიენტებს უქმნიდა სამოსს.
პაუზა 2000 წლამდე გაგრძელდა და ,,Prada'' Group -თან თანამშრომლობით გაგრძელდა.
თუმცა პრადასთან თანამშრომლობის შემდგომ მან სრულ თავისუფლებას მიაღწია, იყო თავის თავის ბატონი, ყველაზე ძლიერი დიზაინერი,დამოუკიდებელი, ყოველგვარი ინვესტორების და ვოგის გარეკანების გარეშე.
ალაიას კოლექციები ყოველთვის იყო დახვეწილი და სექსუალური- სიშიშვლის აფიშირების გარეშე.
2007 წლიდან ალაიას ბრენდი იწყებს ფეხსაცმლის და ჩანთების გამოშვებას.
.
2013 წლიდან Beaute Prestige International-თან გაფორმდა ხელშეკრულება და გაყიდვაში გამოვიდა პარფიუმი- Azzedine Alaia.
აზადინ ალაიას სამოსის ატარებს ძალიან ბევრი ცნობილი ადამიანი.
მიშელ ობამა მისი რეგულარული კლიენტი იყო და სწორედ მისი შექმნილი კაბა ეცვა მას Nato-ს ოფიციალურ საღამოზე სტრასბურგში 2009 წლის 3 აპრილს. ასევე მას ეცვა ელაია American Ballet Theatre's გახსნაზე ნიუ იორკში.
2017 წლის 30 ივლისს მოდის გენია პარიზში 77 წლის ასაკში გარდაიცვალა და ალბათ ყველა მისი ერთგული გულშემატკივრის გულის ნაწილიც წაიღო. განსაკუთრებით მძიმე გადასატანი მისი სიკვდილი ნაომი ქემბელისთვის იყო, რადგან მათ ძალიან ახლო, მამა- შვილური ურთიერთობა ჰქონდათ იმ დროიდან დაწყებული, როცა ნაომი ინგლისადან ახალი ჩასული იყო საფრანგეთში, იმ დროიდან როდესაც მას არავინ იცნობდა ალაიამ გაუღო საკუთარი სახლის კარი და მისი მუზაც გახდა. აზადინს ნაომი ''Papa''-ს ეძახდა, ხოლო აზადინი ნაომის '' Ma Fille''-ს.
აზადინის ნაირი დიზაინერები მილიონში ერთნი იბადებიან და კიდევ უფრო იშვიათია დიზაინერი ჰუმანურობის უმაღლესი გამოვლინებით.
იმედი მაქვს, ცოტათი მაინც შევძელი თქვენთვის ეს დიდებული დიზაინერი გამეცნო. ძალიან გამიხარდება თუ მისი კოლექციების სხვა ფოტოებსაც მოიძიებთ და ისე შეიყვარებთ მისი შემოქმედებას, როგორც მე მიყვარს. მიყვარს კი არა, ვაღმერთებ !
